逃兵「高達」

2021:

8月6號，政壇術士「高達」，鬼鬼鼠鼠飛咗去倫敦……
8月6號之前兩日，「高達」呼籲「白鴿黨」黨員堅持做好地區工作……
8月6號之前一星期，「高達」同「白鴿黨」成員一齊食飯，討論香港前途……
6月20號，「高達」再出任「白鴿黨」副主席，以穩定黨內士氣 ……

政壇號稱「高達」嘅李x達，年近70，喺香港讀完大學，教咗幾年中學，之後就從政。睇返佢過去幾十年喺政壇，資質平庸，點解會彈得起有人識？我零零發綜合咗各路江湖傳聞，佢有今日，皆因有三多。

「所謂貴人」多
「高達」當時嘅第一名貴人，就係吳X欽。據說兩人曾經喺屯門大興邨佛教沈香林中學任教，吳X欽在政治上較受歡迎，力撐「高達」。「高達」喺1985年當選葵青區區議員，佢嗰時靠黐住其他「犯民」，成為葵青七子之一。喺1991年埋咗「白頭李」、司x華、劉x石等人成立嘅「港X盟」，(「白鴿黨」前身」)，成功進入立法局。回歸後，就斷斷續續做議員，直到2012年落敗後就冇再參選。

「高達」好擅長借力打力，做議員嗰段時間，佢又搵到第二個貴人，「白鴿黨」第2任主席楊X。「老楊」除咗同啲「犯民」大佬係老best之外，仲要係「生果佬」襟兄弟。其實識人好過識字，2004年「老楊」放棄連任，就直接推咗 「高達」上去做「白鴿黨」黨主席。雖然「高達」做過「白鴿黨」正/副主席，但冇乜能力，不過佢心頭高，又不自量力，所以佢喺2005年嘅時候，仲學人參選行政長官，但係最後連提名都攞唔到!

「高達」雖然所有議席都輸晒，但一直霸住「白鴿黨」中常委有真正話事權一職，打死都唔走，原來佢黐到第3個貴人「生果佬」，所以要留喺度幫佢操盤。唔好以為有貴人就掂晒，聽聞「高達」要全天候服侍「生果佬」，要隨傳隨到，仲頻頻被召去佢何文田屋企接order。

喺佔中期間，「高達」多次被影到同禍港「犯民」老鬼「白頭李」、「AV仁」同「陳四萬」去「生果佬」屋企密會，雖然「佔中運動」最後失敗收場，但「高達」就成功表忠搏出位，喺中環、金鐘示威，結果被控煽感他人非法阻礙行車路，判監8個月，緩刑兩年。

2014年12月，「高達」喺一個網台節目，公開暗示「生果佬」係「白鴿黨」嘅金主。佢又自爆喺佔中期間，「生果佬」一個鐘頭打13次電話俾佢，主僕嘅關係都幾明顯囉! 到咗2019年6月，「生果佬」由台灣返香港後，就急召「白頭李」、「AV仁」同「高達」去屋企密會兩個多小時，冇耐大家都知發生咩事啦！「高達」同「生果佬」關係咁深，所以佢點會唔驚俾人拉、點會唔着草啊!

出賣人多
「高達」出咗名思維同人都無乜高度，所以喺1987年時任英國外相賀維訪問香港，出席晚宴宣佈1988年香港立法局會取消直選嘅時候，「高達」就搏一鋪，拉條banner出嚟，大大聲用英文鬧賀維「Bullshit! Shame on you」! 原來為咗搏出位、搏上鏡，開條路畀佢哋去選舉嘅主子都要出賣!

喺35+案認罪嘅被告區X軒，佢岳母原來就係「高達」前妻「萍姐」個妹(下一段再講)，可能愛屋及烏，所以「高達」積極向「戴妖」、李X人推薦區X軒出任「非法初選」嘅籌劃者，又欽點為接班人，去幫「戴妖」推銷「非法初選」俾「犯民」各派別，達到推翻政府嘅終極目的！如果唔係有「高達」嘅加持，愛佢變成害佢，區X軒可能唔會行上呢條路!

不過「高達」就醒喇，冇直接參與「非法初選」，但眼見其他骨斡成員同參選人相繼落網，佢「心中有鬼」，擔心自己幕後推動「非法初選」嘅角色被揭發要找數，所以急急腳咁走。佢外逃嘅消息傳出後，引起「白鴿黨」內不少反彈，有黨員喺社交平台形容「高達」：「不負責任，不知所謂」。 早兩日先至拍哂心口，呼籲啲黨員努力做好地區工作，自己轉頭就靜靜雞走佬，完美演繹「叫人衝，自己鬆」!

桃花多
咪睇「高達」咁嘅款，佢最後一多，就係狗血三角戀。做中學老師嘅時候，認識咗同行「英妹」，並於1984年結婚。剛做立法會議員冇耐，喺1992年就搭上女助手「萍姐」，搞婚外情，拋棄糟糠同「小三」結婚。幾年後，呢個「多情矮仔」，又暪住現任太太「萍姐」，翻撻前妻「英妹」，「前正印」竟然淪為「小三」，真係混亂到冇人有。最後再次離婚，2001年再次同前妻結婚。呢啲背叛再背叛嘅男女三角關係，我零零發真係唔識囉！ 而在「犯民」內部，好多人為「英妹」、「萍姐」不值，認為兩個都係好好嘅人，只係畀衰人害咗。

敗走海外後，「高達」接受「劉大姐」嘅訪問，講到自己知嘅嘢太多，唔留得低喺香港，因為好容易會連累其他人咁話……真係笑死隔離，怕死咪認囉，仲要死撐扮大哥！其實大家都估到，如果「高達」被拘捕，為求自保，佢一定會做「二五仔」，爆哂「犯民」啲衰嘢出嚟囉！

而佢走佬之後，就一直霸住個「白鴿黨」副主席嘅位，到2022年5月先至肯申請退黨。點解呢？同其他走佬嘅人一樣，佢出咗去要靠嗶哩吧啦亂講嘢，爭取知名度，等啲反華金主養佢! 如果佢冇咗「白鴿檔」副主席嘅身份，可能就身價暴跌，咁點搵食呀?

「高達」包裝到自己係因為《國安法》打壓而逃走，所以佢經常聯同其他流亡海外嘅黃人，好似周X康、陳X敏、鍾X華，蒙X達、羅X聰等人，出席由美角反華組織「香港監察」、「香港民主委員會」同「香港自由委員會」舉辦嘅論壇/研討會，高調攻擊「一國兩制」，香港民主、言論同信仰自由，講到立咗《國安法》之後，香港被噤聲……佢又經常接受「黃媒」，好似「零角」、「干傳媒」同「chase新聞」嘅訪問。 總之就夾埋反華勢力、同海外「黃人」、「黃媒」，去說一個「假的香港故事」，繼續抓銀，刷存在感啦！

一個無作為、靠挨挨嘣嘣上位嘅小人，如果唔係有以上三多，俾人喺茶餘飯後，可以剝吓花生，我零零發諗，佢到而家都係一名無名矮卒，真係唔會有人識佢囉!

鍾情局●零零發

鍾情局

** 博客文章文責自負,不代表本公司立場 **

上期講到美角執到「生果佬」呢隻千年難得一遇充滿賣國基恩嘅棋子，而家睇吓佢哋幫「生果佬」reset咗個咩人設先！

捍衛新聞自由工作者？

「生果佬」1989年賣民運T恤發咗國難財之後，就搞咗份報紙同周刊。  其實好多香港人都係睇「生果報」大，佢嘅套路主要都係揭人私隱同嘩眾取寵，用狗仔隊去跟蹤名人作故仔，呢啲小報式、簡單而又充滿娛樂性嘅報道手法，好多人都好受落同埋習慣曬；而呢份「生果報」又成日用煽情嘅手法，去報道一啲社會和國家相關嘅議題，制造事端，挑撥民怨民憤，潛移默化地將反政府、反祖家嘅種子，就散落係幾代讀者嘅心裏，目的就係等機會爆發！

咁「生果佬」點解佢會無喇喇去攪報紙、攪雜誌？因為無咩組織嘅影響力同滲透力，會大得過傳媒! 而當「生果報」踩過界嘅時候，本地「毒媒」同美西方就會一唱一和，話香港無新聞自由，話「生果佬」係維護新聞自由嘅犧牲者咁囉！嘩，呢個人設實在太高明了！
 虔誠教徒？

話說「生果佬」1997年入教，搵咗美角一家大報高層「麥昆」做教父，點解「生果佬」會搵美角人，又係做傳媒嘅人做教父嘅？唔通崇拜佢後台夠硬凈，定係可以經常交流報業心得呢？

而家啲外媒成日話「生果佬」係虔誠嘅教徒。我唔明「生果佬」做過啲乜嘢會令大家覺得佢好虔誠呢?「虔誠」呢個加持係邊度嚟㗎呢？唔通佢關照「陳大教主」搭飛機坐頭等艙，可以同佢食飯吹水，就可以高級過其他教徒？唔通出咗錢就係虔誠啲？

民主梟雄？

聽聞同「生果佬」共事過嘅人都會用「一言堂」嚟形容佢，一個本質唔民主，對好多嘢都唔覺得重要嘅人，點解會跑在民主最前線嘅，做咗「犯民」icon嘅？無他嘅，佢一直都用張「生果報」去宣揚美式民主，又踩底祖家，加上佢有錢，養咗唔少犯民線人，好似「陳大教主」、「陳四萬」、「袋巾梁」、「長毛賊」等等！咁好自然，佢就成為「犯民」嘅領頭羊啦！

「生果佬」嘅後半生好似好風光，佢不但被神化為一個虔誠天主教徒，一個白手興家嘅企業家，而且係傳媒大亨，可以同大教主、前高官平起平坐，又可以去美西方見吓啲政要……而自從拉咗佢「串謀勾結外國勢力危害國家安全」罪之後，金主仲加多咗戲份俾佢，就係做受政權迫害嘅「囚犯」！係美西方部署下，「生果佬」即刻被360度無死角咁利用，去抹黑香港嘅司法制度同囚權嘅情況；嗰啲無理指控同謬論，真係無日無之，嗡得就嗡， 不過真係有唔少人被誤導咗㗎！

單獨囚禁，剝奪人權 ?

「生果佬」被單獨囚禁呢個安排，由還押嗰日，到今時今日被判刑，一直都被大肆炒作。事實係「生果佬」自己要求單人囚禁，而諗落都覺得正常吖；試問堂堂一個傳媒大亨，點會肯同其他犯一個倉喎！加上佢都係一個「星」級囚犯，點都會自動upgrade 去「獨立倉」啦！仲有，個個囚犯都係「放風」先至可以吸收下陽光同新鮮空氣㗎啦，依家係坐監，你估住酒店咩，日日去曬日光浴呀！

冇適切治療，死於監倉？

「生果佬」個仔叫黎x恩，喺2020年底巳經離開咗香港，咁多年都冇返過香港，冇見過老豆，冇傾過電話，但佢就成日喺外邊講阿爸好慘，有非常嚴重嘅糖尿病，精神又差，又冇得治療，可能會死喺監倉咁話！最近連走咗佬個女黎X，都喺海外同黎X恩一唱一和，講到老竇病到就嚟「si」咁，唔通真係想快啲分身家？

想當年，好多越南人都特登偷渡嚟香港犯案搏拉，目的就係想免費享用一等一嘅醫療，免費醫番好啲奇難雜症，出冊後又一條好漢。另外，一個囚犯要睇病，因為保安風險理由，佢一定唔使好似普通市民咁要等幾粒鐘，所以我零零發夠膽話，囚犯隨時會得到比市民更便捷同更有效率嘅醫療服務呀！

喺2024年11月，「生果佬」自辯去駁斥主控嘅時侯，中氣十足。而喺舊年8月結案陳詞嘅時候，「生果佬」話個心唔舒服，懲教署就即刻安排咗部心臟機去監察住佢嘅健康情況，又日日有救護員standby喺法庭。早兩星期判刑見到「生果佬」，佢確係清減咗啲，但精神好好。好多人用10幾廿萬去美容、健身院，都係想要有呢種「健康瘦」，所以呢啲天花板級頂流嘅醫療服務，喺邊度搵呀！

冇得領聖體？

一班連監都無探過嘅海外律師團隊，就話係代表「生果佬」，成日大大聲同聯合國提出緊急申訴，話特區政府唔尊重宗教自由、懲教署拒絕俾生果佬領聖體等等；而啲外國天主教媒體又冇fact check，就撲出嚟和應，真係亂嗡當秘笈，你話佢哋唔係夾埋都冇人信喇！不過「生果佬」嘅本地律師團隊，一早就話佢哋係唯一代表「生果佬」嘅律師團隊，又澄清係「生果佬」選擇唔使神父為佢做彌撒、領聖體咋！如果咁講，嗰班海外大狀係咪呃人？有冇知法犯法呢？真係要請高人指點迷津喇！

「生果佬」而家被判20年監，外力又用盡所有辦法，大喊話要無條件釋放佢，連冬奧冠軍唔同佢求情都好似欠咗佢咁，你估搵幾個紅鬚綠眼外國官員同議員加持就得咩！香港法庭嘅審訊公開公正，又有上訴機制，而班外國領事又日日去聽審，發生咩事根本一清二楚。所以美西方嘅牌面當然好似「幫緊你、幫緊你」，但實情就係想無限loop 啲謊言，不斷重複「生果佬」嘅人設，去瞞騙所有對單案一知半解嘅人，利用單案去污名化中國。 其實佢哋不知幾開心生果佬判得咁重，因為呢20年都唔使再度新橋，而且佢哋更想「生果佬」可以壯烈犧牲，咁先可以有更多話題去唱衰中央同特區政府。雖然係咁，但「生果佬」都無得say，只可以繼續做鵪鶉，任由宰割。「生果佬」嘅生死，邊到會有人理㗎！

我零零發諗，當初連美西方都估唔到，「生果佬」呢隻蘋果棋可以咁襟玩，唔單止好人好姐嗰時可以利用，而家連衰咗坐緊監都用得，再難聽啲，就算躺平地府，相信都可以繼續無限loop，被消費！

鍾情局●零零發